53. QNG YELLOW PAD

Qng Yellow Pad

Nang: Louie Aldrin Lacson Bartolo


Malambat cu nang pagunaman yting malyayari
Caniting milabas a maculeng panaun
Megumpisa ngan yng canacung tuneng bie
Qng metung a pirasung yellow pad

Qng yellow pad meniuala cu pasibaiu
Qng tuneng tula ampo yumu ning bie
Pinupus mu ngan yng dalumdum
Pepaquit mu cacu yng masalang abac

Qng yellow pad iquit cu quecang cabiasnan
Cabiasnang ala nang macalagpus queca
Cabiasanang paituru qng ustu ampo mayap
Salamat, tiru mu cacu yng matulid

Qng yellow pad, biclat mu pasibaiu
Yng canacung pusu ampo isipan
Qng banglung babie ning tuneng lugud
Lugud a casing niyaman ning tiup a marimlang angin

Nung madinan cu pang pasibaiung panaun
Na sumulat cu pa quening yellow pad
Ecu na mipabureng milucut ampo mipirat
Yting baiung amlat, na ingatan ampo dinan ulaga

Photo Credits:

hiveminer.com/Tags/notepad%2Cwallpaper